معارضة وموالاة

 - يا أخي نحنا بني الحمير صايرين متل غيرنا ما رح نتعلم حتى من خرجنا

- خير شو  القصة 

- تنين حمير  ، بعد عراك بكلام فيه اللي بيسوا واللي ما بيسوا

- أي

- وشو السبب ليش  حتى يختلف بني الحمير

- ليش بني آدم بيتدخل ببني حمير لازم يتدخلو بمشاكل بني آدم

- أي

- أي شو أييي نتفو بعضون ، واحد مع المغالات وواحد مع المعارصة

- شو مغلات ومعارصة كمان حضتك صاير متل بني آدم بتتلاعب بالألفاظ

- أنا بصحح الأأفاظ  ، يعني اللي بيحب التاني وبيقلك مطرح اللي بيدوس بركع وببوس شو بيكون

- بيكون مغالي بحبو

- واللي بيبحث عن أي دعم كان ومن مين ماكان ليخرب بلدو وينفس حقدو شو بيكون

- بيكون  عرص بن عرص ، بس ما قلتلّي شو دخل هالحكي ببني الحمير

- حمارين  واحد مع المعارصة  وواحد مع المغالات ،

- أي

- الأول بيقول : سوريا ، الله ، حاميها

- أي شوفيها

- التاني يرد عليه : سوريا ، حاميها ، حراميها

- أي 

- شو اي ، كل واحد عمل وراء دور وعطى مؤخرتو لإبن جلدته  واشتغل اللبط والرفس والعفس

- أي

- شو أي ما تركو صفة إنسانية إلاّ  وجمعوها فيهم الله يجيرنا من السوء

- وبعدين

- بعدين الله  جاب حمار ابن أصل  وفض المشكل

-  وكيف فض المشكل

- جمع كلمات  الشعارين وحذف الكلمات المتشابهة وعمل شعار جديد بالكلمات  المختلفة اللي اتفق عليها التنين واجتمع شمل الحمارين من جديد على الشعار الجديد 

تحليل طبسياسي (طبي سياسي)

- دخلك شو تحليلك  للإحداث الراهنة بهاللحظة التاريخية اللي عم يمر فيها العالم العربي ، ولوين رح تاخدنا هالإنعطافة التاريخية
- أنا شايف متلها متل غيرها غيمة وبتمر
- بس المرّة غير ، ممكن تكون هالغيمة ماطرة
- من أيمتى ما كان في احتمال أنّو تكون الغيمة ماطرة
- لا لآ ... المرّة غير  ، شو كإنك مو قريان اللحظة التاريخية صح يا صديقي نحنا اليوم أمام انعطافة تاريخية هامة .. المرّة أكيد غير
- أنا ما بدي اقرا ولا بدي حلّل ... ولا حرّم كمان ، لأني من يوم خلقت ونحنا بنمرّ بانعطافات ولحظات تاريخية ، صار معي تخمة بالإنعطافات التاريخية يا أخي
- بس ضوروي نحلل الوضع صح ، لنعرف  على أي حيط بنسند  ضهرنا
- لا تخاف نحنا معشر الحمير كتير ضهرنا بيشيل ومنتحمّل كتير 
- ما اختلفنا بس لازم نعرف شو اللي عمبيصير 
- بسيطة  بدك تحلل رحلك على شي مخبر بيطري
- شو بيطري  ما بيطري
- لوين يعني بيروح الحمار اللي بدو يحلل
- بدّي تحليل سياسي أعرف شو عمبيصير
- دخلك... ليش المخبر الطبي شو بيحلل ؟
- ببحلّل دم ،
- بيحلل بول ؟ 
- أي بيحلّل بول.
- بيحلل خرا ؟
- أي بيحلل
- إذاً بيحلل سياسة
- كيف كيف؟؟؟؟
- مو عم بتشوف معظم المحللين اليوم عالفضائيات بس يحللو عم تطلع روائح زنخة مع التحاليل , يعني متلون متل تحليل المخبر اللي بيحلل بول وبراز ، والمشكل ما عم نعرف هون الريحة هاي من المحلل أم من المواد اللي عم يحللها

الحل الوحيد

- معقول تنتقل عدوى ما يحصل في عربستان وقمعستان وتخلفستان لعنا
- بتقصد لحمارستان ( وهز رأسه إلى الأعلى بمعنى لالالالالالالالالالالالالالالالا )
- طيب ما كل اللي قالو قبل أنّو هنّن مختلفين عن غيرون وما بيصير عندون متل ما صار عند غيرون وصلت لعندون وصار نفس الشي
- صحيح بس عنّا ما رح يصير أكيد أكيد وأنا مسؤول عن كلامي
- شكلك متأكد ، بس كمان غيرك قبل منّك كان متأكد ومع ذلك وصل البلّ لدقنو 
- صحيح ، بس غيري ظن ذلك ووقف يتفرج على غيرو حتى وصل البلّ  لدقنو متل ما قلت
- وشو عملنا حتى ما يوصل البلّ لدقوننّا
- عملنا كتير ... كتير شغلات بتمنع  جماهير حمارستان أنّها تتظاهر .
- خففنا  الضّغط على الحمير وعطيناها شوية حرّية زيادة
- لا
- حسّنّا الوضع الإقتصادي ؟
- كمان لا
- حاربنا الفساد والمفسدين ؟
- لا وستين ألف لا
- ليش لكن ؟
- أصلاً نحنا ما عنّا من كل هالمشاكل اللي حضرتك ذكرتها . وما عنّا ساحات للحرية أو التحرير تتجمع فيها الناس ، ومتل ما بتعرف اللؤلؤ  ما ألو قيمة عندنا كونو مكبرين عقلنا عنّو ، وما عندنا دور عبادة يتجمع فيها المتظاهرين 
 - يعني بفهم من كلامك أنو لافي أسباب للثورة ولا أماكن يجتمعو فيها الثوار ؟
- طبعاً ومع ذلك  تم اتخاذ الإجراءات الكفيلة بعدم قيام أي ثورة في الوطن 
- وشو  هيّي الإجراءات الكفيلة بعدم قيام أي ثورة
- تم اتخاذ إجراء واحد بسيط وكفيل  بمنع  استيراد أي ثورة
- شو هوّي هالإجراء الكفيل بمنع وصول البلّ لدقونّنا
- بسيطة يا سيدي تم  إلغاء يوم من إيام الأسبوع وصار عدد أيام الأسبوع ست أيام فقط
- وشو هوي اليوم اللي تم إلغاؤووووو
- الجمعة

ما رح تظبط معون

- فيك تفهمني شو موقف القارّة العجوز من الوضع في ليبيا
- مافي موقف واحد ، لأنّو كل دولة من دول الإتحاد الأوربي إلها علاقة ومصلحة مختلفة من ليبيا
- بس كأنّو فرنسا اتخذت قرارها واعترفت بالمجلس المؤقت ، وأمريكا اعترفت  بأنو يجب ملاحقة الزنق وعائلتو وجيرانو وكل منتفعاتو لآخر الّدني
- أي بس باقي دول الإتحاد ناطرين قرار من دول الجامعة العربية من أجل اتخاذ قرار بالحظر الجوي
- مين مين  من مين
- ولك حمار وبتظلّك حمار ، من  الجامعة العربية
- ودخلك شو يعني الجامعة العربية ،مو هيي اللي بتمثّل ما تبقى من حكومات القمع العربية اللي شعوبها عم تطالب برحيل حكامها ليلحقو بزين الحكام  وحسنهم
_ شو يعني
-يعني  ..... رح الجامعة العربية تتخذ قرارها الأول لصالح الشعب الليبي ويكون أول قرار بتتخذو الجامعة لمصلحة شعب ويمكن يتغيّر اسمها إلى جامعة الشعوب العربية